தானத்தில் செய்யக் கூடாத தவறுகள்: எவை பெறலாம், எவை பெறக்கூடாது?

November 5, 2025

தானம் என்பது மனிதனின் உயர்ந்த பண்புகளில் ஒன்றாகும். ஆனால், தானம் செய்வதில் சில பழைய நம்பிக்கைகள் மற்றும் நெறிகள் உள்ளன. “வலது கை கொடுப்பதை இடது கைக்குத் தெரியக் கூடாது” என்று எப்போதும் சொல்லப்படுகிறது. இதன் பொருள், தானம் பெருமைக்காக அல்ல; அது மனதின் தூய்மையையும், மனித நேயத்தையும் வெளிப்படுத்தும் நல்ல செயல் என்பதை நினைவூட்டுகிறது.

எல்லா பொருட்களையும் தானமாகக் கொடுக்கவும், பெறவும் சரியல்ல. குறிப்பாக ஆன்மிக நோக்கத்திற்காக பயன்படுத்தப்படும் சில புனிதப் பொருட்கள் இலவசமாக வழங்கப்படுவதால் நன்மை தராது என பழைய நம்பிக்கைகள் கூறுகின்றன.

வஸ்திர தானம் மற்றும் நன்மைகள்

வஸ்திர தானம் மிகவும் நன்மை தரும் செயலாக கருதப்படுகிறது. மேலும், புதிதாக வாங்கிய துணிகளை தானமாக வழங்குவது ஒருவரின் ஆயுளையும், ஆனந்தத்தையும், ஆரோக்கியத்தையும் அதிகரிக்கும் என்று நம்பப்படுகிறது.

ஆனால், பயன்படுத்திய துணிகள், நகைகள் அல்லது தனிப்பட்ட மருத்துவப் பொருட்களை தானமாக வழங்குவது எதிர்மறை ஆற்றலை பரப்பும் என கூறப்படுகிறது. எனவே, அவற்றை தானமாகக் கொடுக்கவும், பெறவும் தவிர்க்க வேண்டும்.

வீட்டு உபயோகப் பொருட்கள்

உடைந்து போயிருந்த அல்லது சேதமடைந்த வீட்டு பொருட்களை யாரிடமும் தானமாக அளிக்கக் கூடாது. மேலும், உடைந்த பொம்மைகள், மின் சாதனங்கள், சாமி சிலைகள் மற்றும் புனிதப் படங்கள் தானமாக வழங்கப்பட்டால், அவை வீட்டுக்கும் உறவுகளுக்கும் துரதிர்ஷ்டத்தை ஏற்படுத்தும் என பழைய நம்பிக்கைகள் கூறுகின்றன.

காய்கறி மற்றும் உணவுப் பொருட்கள்

பாகற்காய், சுண்டைக்காய் போன்ற கசப்பு காய்கறிகளை இலவசமாக வழங்கினால் இருவருக்கும் இடையே கசப்பு உருவாகும் என நம்பப்படுகிறது. அதனால் அவற்றை தானமாக வழங்க வேண்டாம்.

ஆனால், அவசியம் கொடுக்க வேண்டிய சூழ்நிலை வந்தால், குறைந்தது ஒரு ரூபாய் பெற்றுவிட்டு கொடுக்க வேண்டும். இதனால் உறவில் நிம்மதியும் இனிமையும் அதிகமாக இருக்கும்.

சேப்பங்கிழங்கு, முள்ளங்கி, பாகற்காய் போன்ற சில பொருட்களை தானமாகப் பெறுவது விரும்பத்தகாததாகக் கருதப்பட்டது.

உப்பு மற்றும் இரும்புப் பொருட்கள்

உப்பு மகாலட்சுமி வாசம் செய்யும் பவித்ரமான பொருள் என கருதப்படுகிறது. அதனால், உப்பையும் இரும்புப் பொருட்களையும் தானமாகவோ, கடனாகவோ கொடுக்கவும், பெறவும் கூடாது என பழைய நம்பிக்கைகள் கூறுகின்றன.

சிறிய ஆணியாக இருந்தாலும், இரும்புப் பொருட்களை கையில் வாங்குவது அல்லது கொடுப்பது துரதிர்ஷ்டத்தை வரவழைக்கும் என முன்னோர் எச்சரித்தனர். அவசியம் வந்தால், குறைந்தது ஒரு ரூபாய் கொடுத்து வாங்க வேண்டும்.

கூர்மையான பொருட்கள்

அரிவாள், கத்தி, கத்தரிக்கோல், காய்கறி வெட்டும் கருவிகள் போன்ற கூர்மையான இரும்புப் பொருட்களை தானமாகக் கொடுக்கவும், பெறவும் கூடாது.

மேலும், தோஷ நிவர்த்திக்காக எண்ணெய் தானம் செய்வோர், அந்த எண்ணெயை பெறுவது உடல் நலத்திலும் மனநிலையிலும் பாதிப்பை ஏற்படுத்தும் என பழைய நம்பிக்கைகள் எச்சரிக்கின்றன. எனவே, எண்ணெய் தானத்தை வாங்குவது முற்றிலும் தவிர்க்க வேண்டும்.

தானத்தின் நெறிகள்

தானம் நல்ல செயல் என்றாலும், எந்த பொருட்களை கொடுக்க வேண்டும், எவற்றைத் தானமாகக் கொடுக்கக்கூடாது, எந்த பொருட்களைப் பெறக்கூடாது என்பதில் சரியான நெறிகளை பின்பற்ற வேண்டும். இதனால் வாழ்வில் சமநிலையையும், உள அமைதியையும் காக்க முடியும்.