கிரக ஓரைகளின் காலம்

மனித வாழ்வில் கிரகங்கள் முக்கியப் பங்கு வகிக்கின்றன. ஜோதிடத்தில் ஒன்பது கிரகங்களுக்கு முக்கியத்துவம் அளிக்கப்பட்டுள்ளன. இந்த ஒன்பது கிரகங்களுள் இரண்டு கிரகங்கள் – ராகு மற்றும் கேது, நிழல் கிரகங்கள் என்று அழைக்கப்படுகின்றன. சாயா கிரகங்கள் என அழைக்கப்படும் இவற்றைத் தவிர்த்து மற்ற ஏழு கிரகங்கள் வாரத்தின் ஏழு நாட்களில் தனது ஆதிக்கத்தைச் செலுத்துகின்றன. அதன்படி, நவகிரகங்களில் சூரியன் - சந்திரன் - செவ்வாய் - புதன் - குரு - சுக்கிரன் - சனி ஆகிய ஏழு கிரகங்களுக்கும் ஓரைகள் உண்டு. ஒரை என்பது ஒருமணி நேரம். இந்த சொல்லில் இருந்துதான் அதாவது ஓரை என்பதில் இருந்துதான் ஆங்கிலத்தில் Hour என்ற வார்த்தை வந்ததாகச் சொல்லுவார்கள். பொதுவாக புதன் - குரு - சுக்கிரன் ஆகிய ஓரைகளில் நல்ல காரியங்கள் தொடங்கலாம். அதேபோல் வளர்பிறையில் சந்திரனுடைய ஓரையும் நல்ல காரியங்களுக்கு எடுத்துக்கொள்ளலாம். ஓரை பார்ப்பவன் சோரம் போக மாட்டான் என்று கூறுவார்கள். நல்ல ஓரை பார்த்து செய்யும் செயல்கள் கண்டிப்பாக வெற்றி அடையும் என்பது ஐதீகம்.